Anilkumar Rathwa (Sameer) 18 Mar 2026 ग़ज़ल समाजिक "હસ્તાક્ષર પુરુષાર્થનો" 3897 0 Gujarati :: ગુજરાતી

હથેળીની લકીરોમાં ક્યાં આખું આભ સમાય છે?
જે પરસેવે ન્હાય છે, એનો જ સૂરજ ઊગે છે.

​નસીબ તો છે માત્ર એક માયાવી મૃગજળ ‘દોસ્ત’,
તરસ છિપાવવા અહીં તો પથ્થર પણ ખોદાય છે.

​કિનારે બેસી રહેવાથી સમંદર ક્યાં વશ થાય છે?
ઝંપલાવે જે મધદરિયે, એના જ મોતી પરખાય છે.

​નથી લખાતું ભાગ્ય કદી વિધાતાની કલમથી જ,
પુરુષાર્થના ટાંકણે તો પથ્થર પણ ઈશ્વર દેખાય છે.

​જેણે સમયના વહેણને રોકવાની હામ ભીડી છે,
ઇતિહાસના પાનાઓ પર એનું જ નામ કોતરાય છે.