Anilkumar Rathwa (Sameer) 21 Apr 2026 ग़ज़ल समाजिक #Google #Yahoo #Bing 8140 0 Gujarati :: ગુજરાતી

ક્યારેક કરિયર તો ક્યારેક જવાબદારી નડે છે,
મધ્યમ વર્ગને સપનાં પણ હપ્તે હપ્તે જ મળે છે.

​આ લોકલ ટ્રેનની ભીડમાં જે ચહેરો થાકેલો છે,
એ જ માણસ સવારે ઘરનો થાંભલો થઈ નીકળે છે.

​ખિસ્સામાં રાખ્યા છે ગીરવે કેટલાય ઓરતા,
બસ, થોડું કમાઈ લઉં — એ આશાએ દિવસ ઢળે છે.

​દીકરાની ફી ને પિતાની દવા વચ્ચે જે અટવાય છે,
એની આંખમાં જ આખા ઘરની આબરૂ પળે છે.

​પોતાના મોજ-શોખ સમેટી રાખ્યા છે કબાટમાં,
તહેવાર આવે ત્યારે બાળકોના હૈયે એ ખીલે છે.

​સાહેબની એક 'હા' માટે આખું આયખું ઘસાય છે,
ફાઈલોના થપ્પા નીચે લોહી પાણી થઈ ગળે છે.

​હારવાની હિંમત નથી ને જીતવાની ઉતાવળ છે,
આ જ કશ્મકશમાં 'સમીર' આખો જન્મારો કળે છે.